ආණ්ඩුක්රම ව්යවස්ථාවේ 22 වන සංශෝධන පනත් කෙටුම්පතට අදාළ පෙත්සම් විභාගය නිරීක්ෂණය කිරීම සඳහා මෙරටට පැමිණි පොදුරාජ්ය මණ්ඩල නීතීඥ සංගමයේ සභාපති ස්ටීවන් තීරු මහතා, එම විභාගය අවසානයේ මාධ්ය වෙත සිය නිරීක්ෂණ සහ අදහස් පළ කළේය.
ඔහු සඳහන් කළේ විනිසුරු මඩුල්ල ඉතා ඉවසීමෙන් යුතුව කටයුතු කරමින් නීතීඥවරුන්ට කරුණු ඉදිරිපත් කිරීමට ප්රමාණවත් කාලයක් ලබා දුන් බවයි. කෙසේ වෙතත්, නඩු විභාගය අවසන් වූ ආකාරය පිළිබඳව ඔහු සිය දැඩි කනස්සල්ල පළ කර සිටියේය.
පෙත්සම්කාර පාර්ශවයේ නීතීඥවරුන්ට වාචිකව පිළිතුරු ලබා දීමට අවස්ථාව ලබා නොදී, ලිඛිතව පමණක් කරුණු ඉදිරිපත් කරන ලෙස දැනුම් දීම අවාසනාවන්ත තත්ත්වයක් බව ස්ටීවන් තීරු මහතා පෙන්වා දුන්නේය.
“බොහෝ අධිකරණ පද්ධතිවල මෙවැනි වැදගත් නඩුවලදී වාචිකව පිළිතුරු දීමේ අයිතිය නිරන්තරයෙන් ලබා දෙනවා. එය සාමාන්යයෙන් සිදුවන දෙයක් නොවෙයි,” යනුවෙන් ඔහු අවධාරණය කළේය.
අධිකරණයේ ස්වාධීනත්වයට සෘජුවම බලපාන මෙවැනි තීරණාත්මක නඩුවක් සඳහා පූර්ණ විනිසුරු මඩුල්ලක් හෝ ජ්යෙෂ්ඨතම විනිසුරුවරුන්ගෙන් සැදුම්ලත් මඩුල්ලක් පත් නොකිරීම පිළිබඳවද ඔහු ප්රශ්න කර සිටියේය.
අගවිනිසුරුවරයා මඩුල්ලේ සිටියද, අනෙකුත් ජ්යෙෂ්ඨතම විනිසුරුවරුන් මෙම විභාගයට අසුන් නොගැනීම පිළිබඳව නීති වෘත්තිකයන් අතර කනස්සල්ලක් පවතින බව ඔහු සඳහන් කළේය.
සාමාන්යයෙන් මෙවැනි වැදගත් අවස්ථාවලදී අධිකරණයේ ඉහළම නිලධාරීන් සිව්දෙනාම අසුන් ගන්නා බව ඔහු වැඩිදුරටත් පැවසීය.
අධිකරණයේ ස්වාධීනත්වය යනු ඕනෑම රටක පුරවැසියාගේ අවසාන බලකොටුව බවත්, රජයේ බලයට එරෙහිව පුරවැසියා ආරක්ෂා කරන්නේ ස්වාධීන අධිකරණයක් මගින් බවත් ස්ටීවන් තීරු මහතා මෙහිදී සිහිපත් කළේය.
“යම් හෙයකින් අධිකරණයේ ස්වාධීනත්වයට හානි වුවහොත්, ඉන් ගොඩ ඒමට වසර ගණනාවක් ගත වෙනවා. එවැනි රටවල අධිකරණය කෙරෙහි මහජන විශ්වාසයක් නැහැ,” යැයි ඔහු පැවසීය.
මෙම නඩු විභාගය හරහා අධිකරණය කෙරෙහි පවතින මහජන විශ්වාසය තහවුරු වන්නේද නැතහොත් පිරිහෙන්නේද යන්න පිළිබඳව අවධානය යොමු කළ යුතු බවත්, එම විශ්වාසය රැක ගැනීම නීති වෘත්තිකයන්ගේ මෙන්ම ජාත්යන්තර සංවිධානවලද වගකීමක් බව ඔහු අවසාන වශයෙන් ප්රකාශ කළේය.