ඉරාන සහාය ලබන යේමනයේ හුති සටන්කාමීන් රතු මුහුදේ උපායමාර්ගික මුහුදු පිවිසුම් මාර්ගයක් ආසන්නයට වේගයෙන් ළඟා වීමත් සමඟ, ඔවුන් ඉලක්ක කර ගුවන් ප්රහාර එල්ල කරන ලෙස සෞදි ඔටුන්න හිමි මොහොමඩ් බින් සල්මාන් කුමරු ඇමෙරිකානු ජනාධිපති ඩොනල්ඩ් ට්රම්ප්ගෙන් දුරකතන ඇමතුම් දෙකක් ඔස්සේ දැඩි ඉල්ලීමක් කර ඇති නමුත් ජනාධිපති ට්රම්ප් එම ඉල්ලීම ප්රතික්ෂේප කර ඇති බව ඇමෙරිකානු නිලධාරීන් උපුටා දක්වමින් විදෙස් මාධ්ය වාර්තා කර සිටී.
මේ මොහොතේ හුති සටන්කාමීන්ට එරෙහිව සෘජු හමුදාමය මැදිහත්වීමක් සිදු කිරීමට වොෂින්ටන පරිපාලනයට කිසිදු සැලසුමක් නොමැති බව ඇමෙරිකානු නිලධාරීහු අවධාරණය කරති.
යේමනයේ මොකා නමැති උපායමාර්ගික වෙරළබඩ නගරය හුතිවරුන් විසින් අත්පත් කර ගැනීමත් සමඟ, ගෝලීය වෙළෙඳාමට මෙන්ම සෞදි තෙල් අපනයනයට අතිශය වැදගත් වන බබ් එල්-මැන්ඩෙබ් සමුද්ර සන්ධිය වෙත ඔවුන් තවදුරටත් ආසන්න වී තිබේ.
දැනටමත් ඉරානය විසින් හෝමූස් සමුද්ර සන්ධියේ නාවික ගමනාගමනයට බාධා කරමින් සිටින පසුබිමක, බබ් එල්-මැන්ඩෙබ් සමුද්ර සන්ධියේ පාලනය ද හුතිවරුන් සතු වීම මඟින් එක්සත් ජනපදයට සහ එහි ගල්ෆ් කලාපීය මිත්ර පාර්ශ්වයන්ට එරෙහිව ටෙහෙරානයට දැවැන්ත උපායමාර්ගික බලපෑමක් එල්ල කිරීමේ හැකියාව හිමිවනු ඇතැයි විදෙස් විශ්ලේෂකයෝ පෙන්වා දෙති.
යේමනයේ උත්සන්න වන මෙම ගැටුම්කාරී තත්ත්වය පිළිබඳව දැඩි අවධානයෙන් පසුවන ඇමෙරිකාව, සෘජු යුද මෙහෙයුම්වලින් වැළකී සිටින අතරතුර සෞදි අරාබියට ලබා දෙන සහයෝගය ඉහළ නැංවීමට පියවර ගෙන ඇත.
ඒ අනුව හදිසි සම්බන්ධීකරණ සාකච්ඡා සඳහා ඇමෙරිකානු මධ්යම අණදෙන මූලස්ථානයේ ප්රධානී අද්මිරාල් බ්රැඩ් කූපර් පසුගිය බ්රහස්පතින්දා සෞදි අරාබිය බලා පිටත්ව ගොස් තිබේ.
සෘජු ප්රහාර ප්රතික්ෂේප කළ ද, හුති ඉලක්ක පිළිබඳ බුද්ධි තොරතුරු සහ ඉලක්කගත දත්ත සෞදි අරාබිය වෙත ලබා දීමට ට්රම්ප් පරිපාලනය එකඟ වී ඇති අතර, ප්රහාරක නොවන සහයෝගය ලබා දීම සඳහා ඇමෙරිකානු හමුදා නිලධාරීන් 200ක පමණ පිරිසක් දැනටමත් සෞදි අරාබියේ ස්ථානගත කර සිටිති.
සෞදි හිතවාදී යේමන හමුදා පසුබසිමින් හුති සටන්කාමීන් ඉදිරියට ඇදී එද්දී සල්මාන් කුමරු ජනාධිපති ට්රම්ප් අමතා මෙම හමුදාමය සහය ඉල්ලා ඇත. පසුගිය ජූලි මාසයේදී හුති තර්ජනයට තනිව මුහුණ දිය හැකි බව වොෂින්ටනයට දැනුම් දුන් සෞදි අරාබිය, මෙලෙස සෘජු ඇමෙරිකානු මැදිහත්වීමක් අපේක්ෂා කිරීම ඔවුන්ගේ ස්ථාවරයේ කැපී පෙනෙන පසුබැසීමක් ලෙස සැලකේ.
කෙසේ වෙතත්, ඇමෙරිකානු හමුදා ප්රධාන වශයෙන් ඉරානය සහ හෝමූස් සමුද්ර සන්ධිය කෙරෙහි පමණක් අවධානය යොමු කළ යුතු බවත්, තවත් යුද පෙරමුණක් විවෘත කිරීමෙන් වැළකිය යුතු බවත් ට්රම්ප්ගේ උපදෙස වී ඇති බව අදාළ සාකච්ඡා පිළිබඳ දන්නා ආරංචි මාර්ග සඳහන් කරයි.
පසුගිය ජූලි මාසයේදී ඉරානයේ හිටපු උත්තරීතර නායක අලි කමේනිගේ අවමංගල්යයට සහභාගී වී ආපසු පැමිණි ජ්යෙෂ්ඨ හුති නියෝජිතයන් රැගත් ඉරාන ගුවන් යානයකට සනා ගුවන්තොටුපළට ගොඩබැස්සවීම සෞදි අරාබිය විසින් වළක්වනු ලැබීමත් සමඟ මෙම ගැටුම යළි උග්ර අතට හැරුණි.
ඊට ප්රතිචාර ලෙස හුතිවරුන් රතු මුහුදේ සෞදි තෙල් ප්රවාහන නෞකාවලට සහ එරට බලශක්ති මධ්යස්ථානවලට පහර දීම ආරම්භ කළ අතර, සෞදි අරාබිය සිය මිත්ර හමුදා සමඟ එක්ව ගුවන් හා ගොඩබිම් ප්රහාර මඟින් ඊට ප්රතිප්රහාර එල්ල කළේය.
රතු මුහුදේ නාවික ගමනාගමනයේ නිදහස තහවුරු කිරීම සහ තම මූලික ජාතික ආරක්ෂක අවශ්යතා සුරක්ෂිත කිරීම කෙරෙහි වොෂින්ටනය ප්රමුඛත්වය ලබා දෙන නමුත්, කලාපීය ආරක්ෂක අර්බුද කළමනාකරණය කර ගැනීමේ වගකීම ප්රාදේශීය හවුල්කරුවන්ට භාර දීම සිය ප්රතිපත්තිය බව ඇමෙරිකානු ජ්යෙෂ්ඨ නිලධාරියෙකු වැඩිදුරටත් සඳහන් කර තිබේ.