මෙරට ප්රධාන තිරිඟු පිටි සැපයුම්කරුවන් වන ප්රීමා (Prima) සහ සෙරන්ඩිබ් (Serendib) සමාගම් විසින් තිරිඟු පිටි කිලෝග්රෑමයක මිල රුපියල් 17කින් ඉහළ දැමීමට පියවර ගැනීමත් සමඟ, පාන් ඇතුළු බේකරි නිෂ්පාදනවල මිල ගණන් ද ඉදිරියේදී ඉහළ යනු ඇතැයි වාර්තා වේ.
අද (29) සිට ක්රියාත්මක වන පරිදි සිදුකළ මෙම මිල සංශෝධනය හේතුවෙන් පාන්, බනිස්, රෝල්ස් සහ පැටිස් ඇතුළු පිටි ආශ්රිත නිෂ්පාදන රැසක මිල ඉහළ යාමේ අවදානමක් මතුව තිබේ.
තිරිඟු පිටි මිල ඉහළ යාම හමුවේ සිය නිෂ්පාදන පිරිවැය ද ඉහළ යන බැවින්, බේකරි නිෂ්පාදනවල මිල ගණන් සංශෝධනය කිරීමට සිදුවන බව බේකරි හිමියන් පෙන්වා දෙයි.
Subscribing To News
ලෝක වෙළෙඳපොළේ තිරිඟු මිල ඉහළ යාම, නෞකා ප්රවාහන සහ රක්ෂණ ගාස්තු ඉහළ යාම මෙම මිල වැඩි කිරීමට ප්රධාන හේතු වී තිබේ. විශේෂයෙන්ම ඕස්ට්රේලියාව සහ කැනඩාව වැනි විකල්ප වෙළෙඳපොළවලින් තිරිඟු ආනයනය කිරීමට සිදුවීමෙන් තමන් දැඩි පිරිවැය පීඩනයකට ලක්ව සිටින බව ආනයනික සමාගම් පවසයි.
මේ සම්බන්ධයෙන් වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්ය වසන්ත සමරසිංහ මහතා සමඟ පැවැති සාකච්ඡාවකදී ආනයනකරුවන් මෙම ගැටලු ඉදිරිපත් කර ඇත.