රජය විසින් ක්රියාවට නංවන පුළුල් ඩිජිටල්කරණ වැඩපිළිවෙළ යටතේ, ඉදිරි වසර තුන තුළ දිවයින පුරා පූර්ණ අධිවේගී 4G ආවරණයක් ලබා දීම සඳහා අලුතින් සන්නිවේදන කුලුනු 1000ක් ස්ථාපිත කිරීමට පියවර ගන්නා බව ජනාධිපති අනුර කුමාර දිසානායක මහතා ප්රකාශ කළේය.
අකුරැස්ස පැවති ජන රැලිය අමතමින් ජනාධිපතිවරයා මේ බව සඳහන් කළේය.
රාජ්ය ආයතන සමඟ ජනතාවට සිදු කර ගැනීමට ඇති බොහෝ කටයුතු නිවසේ සිටම පහසුවෙන් ඉටු කරගත හැකි අයුරින් ඩිජිටල් පද්ධතිය ශක්තිමත් කිරීම රජයේ ප්රධාන අරමුණක් බව පැවසූ ජනාධිපතිවරයා, එම පහසුකම් නිසි පරිදි භුක්ති විඳීමට නම් රට පුරා ශක්තිමත් අන්තර්ජාල සංඥා පද්ධතියක් පැවතිය යුතු බව පෙන්වා දුන්නේය.
සංඥා ලබා ගැනීම සඳහා ජනතාවට වහලවල් හෝ කඳු මුදුන් මතට නැගීමට සිදුවන අපහසුතාව වහා අවසන් කළ යුතු බව අවධාරණය කළ ඒ මහතා, ඒ අනුව ලබන වසරේදී ඉදිකෙරෙන කුලුනු 250 ද ඇතුළුව ඉදිරි තෙවසර තුළ නව කුලුනු 1000 ක වැඩ අවසන් කර මුළු දිවයිනම ආවරණය කරන බව කියා සිටියේය.
“ආණ්ඩුවත් එක්ක කරන්න තියෙන ගොඩක් වැඩ ගෙදර ඉඳන් කරන්න පුළුවන් විදිහට ඩිජිටල් පද්ධතියත් සවිමත් කරනවා. එතකොට සිග්නල් තියෙන්න ඕන. වහල උඩට නගින්න. කන්දට නගින්න. ෆෝන් එක ඔබ ඔබ වටේ දුවන්න වැඩක් නෑනේ.
ලංකාවේ පළවෙනි වතාවට වැඩිම වේගවත් ඉන්ටර්නෙට් ජාලය 4G තාක්ෂණයෙන් ඉදිරි වසර තුන තුළ ලංකාව පුරාම ආවරණය දෙන්න කුලුනු දාහක් ගහනවා. ලබන අවුරුද්දේ අපි කුලුනු 250ක් ගහනවා. අවුරුදු තුනක් ඇතුළත කුලුනු දාහක් ගහලා මුළු රටම ආවරණය කරනවා.”
එක් පසෙකින් රට තුළ පුළුල් දේශපාලන පරිවර්තනයක් සිදු කරන අතරතුර, අනෙක් පසින් සාමාන්ය ජනතාවගේ දෛනික ජීවිතයේ පවතින මෙවැනි ප්රායෝගික ගැටලුවලට ස්ථිරසාර විසඳුම් ලබා දීමට රජය කැපවී ක්රියා කරන බවද ජනාධිපතිවරයා වැඩිදුරටත් අවධාරණය කළේය.
